Австриската политика повторно се наоѓа во состојба на длабока нестабилност поради драматичните промени во рејтинзите на владејачките партии, што се појавија во најновите анкети. Народната партија (ОВП) и Социјалдемократската партија (СПО) се соочуваат со пад, што според политичките аналитичари ја доведува во прашање нивната способност да се борат со растечкиот политички подем на Слободарската партија на Австрија. Од редовите на коалицијата веќе стигнуваат сигнали на загриженост, бидејки резултатите укажуваат дека доколку изборите би се одржале сега, владата не би можела да смета на мнозинство. Ситуацијата дополнително се усложнува поради тоа што ФПО се наоѓа во најсилна позиција во последните години, со поддршка која ја надминува границата од триесет и пет проценти. Политичката клима во земјата станува сè понервозна, а пред Австрија претстојат неколку изборни циклуси кои би можеле значајно да го променат политичкиот баланс.

Опаѓање на поддршката и политичка неизвесност

Во самата коалиција се чувствува растечка нервоза, бидејќи најновите податоци укажуваат дека Народната партија би изгубила уште пет процентни поени во споредба со последните избори и би паднала на дваесет и еден процент поддршка, што претставува историски слаб резултат. Социјалдемократите, со седумнаесет до осумнаесет проценти, исто така би го достигнале својот најнизок рејтинг досега. Од коалициските кругови пристигнуваат сигнали дека постои одредена беспомошност околу прашањето како да се запре падот, а уште помалку постои јасна идеја како да се воспостави нов политички моментум.

Годината 2026-та формално остава простор за започнување на покрупни реформи, бидејќи нема државни избори, освен локалната трка во Грац која има одредено политичко значење. Но и покрај тоа, коалицијата не покажува подготвеност за носење на непопуларни одлуки. Дел од функционерите предупредуваат дека секој ризичен потег би можел дополнително да ѝ користи на ФПО, што ја прави политичката стратегија уште потешка. Немир владее и во сојузните покраини, каде што политичарите се прашуваат како да одговорат на растечката поддршка за ФПО, која сега привлекува гласачи од различни слоеви.
Следната сериозна политичка пресметка ќе се случи во 2027 година, кога Тирол и Горна Австрија ќе ги одржат покраинските избори. Во Тирол, ФПО веќе е втора сила и се позиционира како сериозен предизвикувач на коалицијата. Во Горна Австрија, пак, ФПО веќе ја надминува ОВП во повеќе анкети, што би можело да создаде драматични промени на локалната сцена. Политичките аналитичари предупредуваат дека овие избори ќе бидат еден од најважните индикатори за тоа како ќе изгледа државната политика во следните години.

Претстојни избори и растечкото влијание на ФПО

Годината 2028 ќе биде клучна, бидејќи тогаш ќе се одржат избори во три сојузни покраини, како и изборот на нов претседател на државата. Во Долна Австрија и Салцбург, ФПО е дел од покраинските влади, што ја зацврстува нивната политичка основа и им олеснува да настапат со поголема самодоверба. Во Корушка, по повлекувањето на Петер Кајзер, социјалдемократите се обидуваат да се преструктуираат под ново раководство, но според политичките набљудувачи тие се наоѓаат во незавидна позиција. Нема јасна лидерска фигура, а ФПО ја користи ваквата празнина за да ја прошири својата поддршка. Многумина сметаат дека ФПО има реална шанса да го освои првото место во оваа покраина.
Паралелно со покраинските избори, Австрија ќе влезе во изборите за претседател на државата, при што актуелниот претседател Александар ван дер Белен нема право на нов мандат. Партиите размислуваат за потенцијални кандидати, но ако се земат предвид моменталните анкети, кандидат на ФПО би имал најдобра почетна позиција. Некои политички коментатори веќе предупредуваат дека е можно сценарио во кое кандидат на ФПО влегува во втор круг со реални шанси за победа.

Сето ова ќе биде вовед во најважниот политички настан, парламентарните избори во 2029 година. Доколку ФПО успее да го задржи сегашниот тренд, Австрија би можела да се соочи со досега невидена политичка доминација на оваа партија. Во моментов, владините партии се во потешка ситуација, додека ФПО продолжува да доминира, а мерките за запирање на нивниот раст се неуспешни..