Aстрономскиот проект на деценијата започна — најголемата камера во светот го мапира универзумот
Најголемиот дигитален фотоапарат во светот започна десетгодишна мисија за мапирање на јужното ноќно небо од опсерваторијата „Вера Ц. Рубин“ во Чиле.
Препорачано
Сместен на врвот на планината Серо Пачон, фотоапаратот е со големина на мал автомобил и тежи околу 3.000 килограми. Во текот на следните десет години, ќе прави помеѓу 700 и 800 слики секоја ноќ, создавајќи невидено детален преглед на универзумот, пишува „Евроњуз“.
Фил Маршал, заменик-директор за операции во Националната научна фондација и Министерството за енергетика на САД во опсерваторијата „Вера Ц. Рубин“, рече дека проектот ќе им овозможи на научниците да „го покријат целото јужно ноќно небо“ и да создадат детален инвентар на објекти во Сончевиот систем.
Маршал рече дека набљудувањата би можеле да им помогнат на истражувачите да откријат милиони астероиди, да бараат хипотетичка Планета Девет, да го мапираат Млечниот Пат и да проучуваат супернови, црни дупки, темна материја и темна енергија.
Опсерваторијата е именувана по астрономот Вера Рубин, чие пионерско истражување обезбеди прв силен доказ за постоењето на темна материја.
Минатата година, „Вера Рубин“ ги објави своите први фотографии, вклучувајќи спектакуларни погледи на маглината Лагуна, оддалечена илјадници светлосни години од Земјата, пред да започне со целосни научни операции.
Маршал го опиша проектот како голем научен потфат базиран на меѓународна соработка, нагласувајќи дека тој покажува што може да се постигне кога големи меѓународни тимови работат заедно на амбициозни истражувачки проекти.
