Градоначалничката на Град Скопје, Данела Арсовска достави иницијатива до Советот на Град Скопје за повторно поставување на спомен обележјето на македонскиот револуционер Андон Лазов Јанев – Ќосето.

Спомен обележјето ќе добие нова локација која ќе се наоѓа на крстосницата помеѓу булеварот Александар Македонски и булеварот Беласица североисточно од кружниот тек. Се работи за исклучително важна историска личност и еден од најголемите македонски револуционери чиј споменик неправедно и шверцерски беше отстранет од претходното градско раководство. Нема да дозволиме споменикот на македонскиот револуционер да рѓосува по магацини, затоа апелираме час поскоро оваа точка да биде ставена на дневен ред во Советот на Град Скопје и веднаш да биде изгласана – информира Арсовска.

Според неа на овој начин ќе се исправи неправдата кон луѓето кои го дале својот живот за независна и суверена Република Македонија.

Споменикот на Ќосето беше поставен во 2014 година пред зградата на Врховен суд, а беше отстранет четири години подоцна и однесен во магацините на поранешната фабрика Металскиот завод Тито.