Аргентина ќе настапи во темно син гостински дрес на полуфиналниот натпревар против Англија на Светското првенство, кој ќе се одигра в среда од 21:00 часот во Атланта.

Иако натпреварот се игра на неутрален терен, Англија е формален домаќин и ќе настапи во својата препознатлива бела гарнитура, додека аргентинската репрезентација, по специјално барање одобрено од ФИФА, ќе го носи темно синиот дрес.

Изборот веднаш потсети на четвртфиналето од Светското првенство во 1986 година, кога Аргентина во истиот дрес ја совлада Англија со головите на Диего Марадона. На тој натпревар легендарниот Аргентинец ги постигна прочуените голови „Божја рака“ и „Голот на векот“, кои останаа запишани во историјата на светскиот фудбал.

Аргентина и Англија досега петпати се сретнале на Светските првенства, а нивното ривалство е едно од најголемите во репрезентативниот фудбал. Освен спортската, пресметките меѓу двете селекции отсекогаш носеле и силна историска и емоционална симболика.

Полуфиналниот дуел во Атланта ќе биде ново поглавје во ова големо ривалство, а за аргентинските навивачи темно синиот дрес претставува дополнителен симбол на една од најславните победи во историјата на нивната репрезентација.