Поради замена на бандери во селото Ржаничино со нови бетонски столбови од страна на ЕВН, штрковите кои од топлите краишта се вратиле во селото се оневозможени да свијат гнезда и создадат семејства. Жителтие на селото се обратиле до Здружението за заштита на животните „Анима Мунди“, а по неколку дена бил решен проблемот.

Стануваше збор за неколку пара од овие птици преселници, кои се вратија во родниот крај за да создадат подмладок, но на новите бандери немаа како да свијат гнезда. Се обративме во ЕВН и побаравме нивна интервенција за да се заштитат, да се избегне нарушување на нивната биолошката динамика и избегнат низа опасности по птиците, особено малите штркови, велат од Здружението.

Во период од неколку дена, како што велат од „Анима Мунди“, екипи на ЕВН дошле во селото и поставиле метални гнезда на сите посочени локации, а птиците веднаш слетале на своите стари локации за да прават нови гнезда.

Оваа вест е важна за да ја охрабриме хуманоста секогаш и секаде, кон секое живо суштество, а воедно и да ја поттикнеме и засилиме општествената одговорност кон животните, додаваат од Здружението.