Андреа вечерва ќе се бори за пласман во финалето на Евровизија
Вечерва во 21 часот на второто полуфинале на 66-тиот Евросонг кој се одржува во Торино, под покровителство на Европската радиодифузна унија (ЕБУ) и нејзината италијанска членка Раи, нашата евровизиска претставничка Андреа Коевска со песната „Circles“ на Александар Масевски ќе настапи под реден број 11, од вкупно 18 земји учесници.
На евровизиската сцена во Пала Олимпико според точниот редослед, ќе настапат 18 учесници од Финска, Израел, Србија, Азербејџан, Грузија, Малта, Сан Марино, Австралија, Кипар, Ирска, Северна Македонија, Естонија, Романија, Полска, Црна Гора, Белгија, Шведска и Чешка.
На евровизиската сцена од големата петорка ќе настапат и Англија, Германија и Шпанија.
Од првата полуфинална вечер во финалето се пласираа изведувачите од Швајцарија, Ерменија, Исланд, Литванија, Португалија, Норвешка, Грција, Украина, Молдавија и Холандија. Земјите кои испаднаа и нема да ги видиме во големото финале се Словенија, Хрватска, Албанија и Бугарија.
Останува да видиме уште кои 10 земји од втората полуфинална вечер ќе се пласираат во финалето, кое ќе се одржи во сабота, на 14-ти мај.