Израел спроведува „намерна кампања на глад“ во Појасот Газа, соопшти Амнести интернешнл во соопштение објавено денес, додека ОН и многу невладини организации продолжуваат да предупредуваат за претстојниот глад во палестинската енклава.

Оваа израелска кампања „систематски го уништува здравјето, благосостојбата и општественото ткиво“ во Газа, соопшти невладината организација по разговорот со 19 Палестинци од Газа кои живеат во кампови за раселување и двајца членови на медицинскиот персонал кои се грижат за неухранети деца.

Израелското Министерство за надворешни работи и војската не одговорија веднаш на барањето за коментар од АФП за изјавата на Амнести интернешнл.

Според невладината организација, сведоштвата што ги собрала потврдуваат дека „смртоносната комбинација од глад и болести не е несреќна последица од израелските воени операции“ во Газа.

„Тоа е намерен резултат на плановите и политиките што Израел ги организираше и ги спроведе во текот на изминатите 22 месеци за намерно да им наметне на Палестинците од Газа услови за живот со цел да предизвикаат нивно физичко уништување – составен дел од тековниот геноцид на Израел врз Палестинците во Газа“, нагласи невладината организација.

Во април, Амнести интернешнл ги обвини израелските власти дека извршиле „геноцид во пренос во живо“ во Газа, обвинувања што израелското Министерство за надворешни работи ги опиша како „неосновани лаги“.

Когат, агенцијата на израелското Министерство за одбрана одговорна за управување со политичките прашања на палестинските територии, на 12 август процени дека „нема индикации за широко распространета потхранетост“ во Појасот Газа, отфрлајќи го извештајот на Министерството за здравство на Хамас за смртните случаи поради глад.