Американски медиуми: Вакцината на „Фајзер“ и „БајонТек“ обезбедува 100 отсто заштита кај деца од 12 до 15 години
Вакцината против коронавирус на компаниите „Фајзер“ и „БајонТек“ е безбедна и ефикасна кај деца на возраст од 12 до 15 години, јавија американски медиуми. Двете компании објаснија дека вакцината обезбедува 100 отсто заштита. Објавените податоци од студијата значат дека компаниите може да побараат дозвола од американските власти да издадат итно одобрение за ставање во промет во наредните недели.
Резултатите од клиничкото испитување, исто така, покажуваат дека вакцината добро се поднесува кај деца на возраст од 12 до 15 години. Испитувањата во третата фаза вклучиле 2.260 деца на возраст од 12 до 15 години во САД.
Вакцината обезбедува силен имунолошки одговор еден месец по втората доза, надминувајќи ја нејзината ефикасност во споредба со оние на возраст меѓу 16 и 25 години. Во моментот вакцината се користи само во САД кај постари од 16 години.
„Фајзер” се надева дека ќе започне со вакцинирање на оваа група пред почетокот на следната учебна година.