Американската амбасада за пресудата на Панчевски: Позитивен чекор напред!
Американската амбасада во Скопје смета дека првостепената пресуда за поранешниот претседател на скопскиот Кривичен суд, Владимир Панчевски, од три и пол години затвор за злоупотреба на АКМИС системот е позитивен чекор напред во барањето одговорност за оние што се обвинети за поткопување на судската независност.
-Објавата на Основниот суд во Велес дека поранешниот претседател на Кривичниот суд во Скопје, Владимир Панчевски, е осуден на три и пол години затвор за злоупотреби на АКМИС е позитивен чекор напред за барање одговорност за оние што се обвинети за поткопување на судската независност- пишува во твитот на Амбасадата на САД.
The Veles Basic Court announcement that former Skopje Criminal Court President Vladimir Pancevski was sentenced to 3.5 years in prison for misusing ACCMIS is a positive step forward in seeking accountability for those accused of undermining judicial independence. https://t.co/iU2FEoxkPf
— U.S. Embassy North Macedonia (@USEmbassySkopje) August 5, 2020
Панчевски доцна синоќа беше осуден на три години и шест месеци затвор, а пресудата ја објави судијката Валентина Ѓорѓиевска од Основниот суд во Велес.
Обвинетиот Панчевски, според обвинението поднесено од ОЈО Скопје, се товари дека во периодот од 23 јануари 2013 година до 14 септември 2016 година, со негов параф и усно давал наредби на службеници што имале пристап во АКМИС-от рачно да се распределуваат конкретни предмети меѓу судиите надвор од времето на приемот на предметот во судот, и кажувал на кој судија да се распредели предметот, со што целосно се изигрувал системот кој требало автоматски да ги распределува предметите.