Денеска во рамките од 19 коло од македонската ракометна Суперлига, играчите на Алкалоид во салата „Автокоманда“ ја оправдаа фаворитската улога против Пролет 62 со резултат 37:29.

Ласко Андоновски го постигна првиот гол за Пролет 62 во 2026 година, за водство од 1:0 во „Автокоманда“. Нешто подоцна Андреј Стојановски погоди за 2:2, а избраниците на новиот тренер Доне Мајнов целосно му парираа на фаворитот сè до 6:6 со вториот гол на Стојановски.

Алкалоид постигна три гола во низа пред капитенот Андоновски да намали на 9:7, домашниот тим имаше најубедливи „плус четири“ во првото полувреме (11:7 и 12:8). На одмор ракометарите предводени од тренерот Кирил Лазаров имаа водство од 17:14.

Некако спласна одличниот ритам на Пролет 62 што го одржуваше во првото полувреме, а тоа знаеше да го искористи Алкалоид и да ја зголеми предноста и по шест минути игра во вториот дел на семафорот стоеше 21:15. Домаќинот ја казнуваше секоја грешка на гостинот и кон средината на полувремето стигна и до двоцифрена позитива од 28:18 и тука веќе беа решени сите дилеми околу конечниот исход.

Во победничките редови одличен беше Дамјан Митев со 10 гола, четири помалку запиша Филип Николов, а голманот Иван Галевски забележа 13 одбрани.

На спротивната страна Тони Димковски беше прв стрелец со осум погодоци, шест постигна Никола Стоилевски.

На табелата Алкалоид е на четвртото место со 31 бод, колку и третопласираниот ГРК Охрид, додека Пролет 62 е на деветтата позиција со 12 бодови.

Во другите денешни мечеви: Струга – Бутел Скопје 24:35, Еурофарм Пелистер – Еурофарм Пелистер 2 39:24, Тиквеш – Радовиш 44:23.

Табела: Вардар 1961 36 бодови, Еурофарм Пелистер 32, ГРК Охрид 31, Алкалоид 31, Тиквеш 20, Бутел Скопје 20, Еурофарм Пелистер 2 17, Прилеп 16, Пролет 62 12, Куманово 7, Струга 6, Радовиш 0.