Туристите кои летово ќе го посетат познатиот италијански регион Чинкве Тере би можеле скапо да платат ако на планинарските патеки се појават во апостолки или сандали, пишува „Пипл“.

Управата на Националниот парк Национален парк Чинкве Тере продолжува со строгото спроведување на правилото според кое посетителите мора да носат соодветни обувки за пешачење. За оние што ќе бидат затекнати во апостолки, сандали или друга несоодветна обувка, предвидени се казни до 2.500 евра.

Правилото е воведено уште во 2019 година, откако локалните власти забележале зголемен број несреќи на стрмните и лизгави патеки кои ги поврзуваат живописните крајбрежни населби.

Директорот на паркот, Патрицио Скарпелини, тогаш предупреди дека патеките во некои делови наликуваат на вистински планински рути и дека носењето соодветни обувки е неопходно за безбедноста на посетителите.

Освен правилата за обувки, властите воведоа и еднонасочен режим на движење на дел од најпосетуваните патеки со цел да се намали метежот во текот на туристичката сезона. Најпознатата рута меѓу населените места Монтеросо ал Маре и Вернаца на одредени денови функционира како еднонасочна патека во периодот од 9 до 14 часот.

Според управата на паркот, мерките се воведени за да се спречат опасни ситуации на тесните и стрмни делници и да се намали потребата од интервенции на спасувачките служби.

За влез во паркот туристите треба да купат посебна карта за пешачење, чија цена започнува од 10 евра, а во деновите со најголема посетеност достигнува и до 15 евра.

Патот на љубовта: Романтичната пешачка улица во Чинкве Тере е повторно отворена по 12 години