Академија ФМП без мака против Ангели за трето место на табелата
Кошаркарите на Навико Академија ФМП со 83:56 го совладаа тимот на Ангели во кошаркарската Суперлига и се искачија на третото место на табелата.
Академија ФМП победата ја најави уште во првата четвртина која ја доби со 21:11 и до крајот на наптреварот само ја зголемуваа предноста за на крајот да слават со високи 27 поени разлика (83:56). Најефикасен кај Академија ФМП беше Крстајиќ со 19 постигнати поени додека во тимот на Ангели се истакна Атанасов со 12 поени.
Во дербито на 19 коло, ТФТ славеше со 77:68 над Феникс 2010 и влезе во горниот дел од табелата кој носи во разигрувањето за титулата.
Александар Костоски со 21 поен и 6 асистенции беше најдобар кај ТФТ каде се истакна и Смит со дабл-дабл од 15 поени и 16 скока додека кај Феникс 2010, најдобри беа Морган и Трајковски кои дадоа по 21 поен.
Поразот на Феникс 2020, му направи услуга на Еуро Никел да се искачи на шестото место на табелата. Кавадарчани како гости славеа со 67:75 против Куманово и го прескокнаа тимот на Феникс на табелата. Кошаркарите на Еуро Никел одиграа неверојатна трета четвртина која ја добија со 22:9 и ја анулираа негативата од првото полувреме и со рутинска игра дојдоа до победата.
Ѓекиќ со 16 поени беше најпрецизен кај Еуро Никел, додека кај Куманово се истакна Марјановиќ со 23 постигнати поени.