Агуеро оди на Мундијалот во Катар, ќе му биде помошник на селекторот Скалони
Серхио Агуеро преговара со фудбалската федерација на Аргентина да стане дел од стручниот штаб на „гаучосите“ за Светското првенство во Катар кое ќе се игра во ноември и декември годинава.
Агуеро поради срцеви проблеми мораше предвреме да ја заврши кариерата, но сака да остане активно вклучен во фудбалските возбудувања и тоа како тренер.
– Зборував со селекторот Скалони и наредната недела треба да имаме средба. Се обидуваме да најдеме решение и да видиме што можеме да направиме. Првичната идеја е да се приклучам на стручниот штаб на репрезентацијата бидејќи имам голема желба да бидам со мојата Аргентина на Мундијалот во Катар – изјави Агуеро.
Серхио Агуеро во кариерата има настапувано за Индепендиенте, Атлетико Мадрид, Манчестер сити и Барселона, а со репрезентацијата на Аргентина триумфира на Копа Америка, на Олимписките игри и на младинското СП, а сега кога „гаучосите“ повторно се едни од главните фаворити за титулата, сака да биде покрај поранешните колеги.