Пет ракети ја погодија областа околу меѓународниот аеродром во Багдад денес, вклучувајќи го и објектот што го користи амбасадата на САД, при што беа повредени петмина Ирачани, соопштија локални безбедносни извори.

Според овие извори, првата експлозија се слушнала околу 19 часот по локално време. Последователната проценка покажала дека една ракета погодила објект за воздушна навигација во цивилниот дел од аеродромот, додека четири други ракети паднале во центарот за дипломатска поддршка во Багдад БДСЦ, кој го користи амбасадата на САД во Багдад.

Сè уште не е познато кој ги испалил ракетите, пренесуваат медиумите.

Чести напади врз американски објекти во Ирак

Нападите врз објекти поврзани со САД, вклучувајќи ги и локациите во близина на аеродромот во Багдад, се чести во Ирак.

Исламскиот отпор во Ирак, име што го користат вооружените групи поврзани со Иран, во последните недели речиси секојдневно објавуваа соопштенија во кои ја преземаше одговорноста за десетици напади врз американски објекти во Ирак од почетокот на конфликтот меѓу САД, Израел и Иран, притоа честопати без да ја наведува точната локација.

САД претходно извршија напади врз локации поврзани со иранските шиитски милиции, кои Вашингтон ги смета за закана за своите интереси во регионот.