Аца Лукас „удри“ по РТС за изборот на песна за „Евровизија“: Не сакаат да одам затоа што не давам пари
Српскиот фолк пејач Аца Лукас е сигурен во својата победа на српскиот музички натпревар „Песна за Евровизија“ во организација на Српската Радио Телевизија, но пејачот одлучи јавно да ја критикува организацијата на натпреварот за нетранспарентност.
Имено, 53-годишниот Лукас смета дека не е во ред што изведувачите, мора да платат за својот настап.
„Претплатата на РТС ја плаќаат сите граѓани на Србија, за на крај изведувачите да плаќаат за настап на „Песна на Евровизија 22“. И Лукас и Николиќ и јас сме луѓе со кариери и не припаѓаме на оние кои ќе молчат. Го креваме гласот и во име на оние помлади изведувачи кои не можат да го направат тоа, но ние можеме и ќе ја одбраниме нивната чест“, порачаа од тимот на Аца на конференцијата.
Пејачот бара од уредничката на забавната програма на РТС да соопшти кој ќе биде во жирито на натпреварот, а тој смета дека има најголеми шанси за победа. Како што тврди пејачот, уредничката Оливера Ковачевиќ наводно е една од оние кои се против него.
„Уште минатата година реков дека ќе се пријавам на конкурсот, а госпоѓата Ковачевиќ тогаш изјави дека ќе се натпреварувам само преку неа мртва. А, зошто? Затоа што јас не давам пари. Аца Лукас оди на натпревар за да победи или да не победи, но не плаќа за победа и не плаќа за да оди на „Евровизија“ бидејќи одењето на „Евровизија“ не се плаќа. Кој ќе плати за да оди на „Евровизија“ ќе каже Оливера Ковачевиќ. Оваа година, ви гарантирам, на „Евровизија“ ќе оди уметник кој нема да плати за тоа бидејќи таа ќе каже кои се членовите на жирито, а ќе оди најдобриот изведувач кој ја заслужил победата и за кого гласала публиката“, остро порача пејачот.
View this post on Instagram
„Знаеме дека би имал најголеми шанси на „Евровизија“ бидејќи за мене би гласале сите републики од поранешна Југославија, но и дијаспората. Ковачевиќ не ме сака во Торино и лобира за некој друг, но таа личност нема да ја спомнам бидејќи не е убаво. Мојата песна е од мене за мојата Србија. Тоа не е сопственост на РТС и не ме интересира што мислат тамошните уредници. Претставувањето на Србија во светот не е работа на РТС и тие нема да одредуваат кој ќе ја претставува Србија во ништо, дури ни во музика. Лукас оди од срце во натпреварот, за да ѝ донесе на својата земја најдобар пласман и резултат. Нема да ги носам работниците и раководството на РТС во Торино да носат „Луј Витон“ и „Гучи“ ќеси додека јас имам проби“, заклучил Аца, пренесува „Новости.рс“.
View this post on Instagram
Набргу по обвинувањата, РТС им одговори на пејачот и неговиот тим, а „Телеграф“ ја пренесе изјавата во целост:
„Радио-телевизија на Србија, по повод медиумската конференција на еден од учесниците во шоуто „Песна за Евровизија 22“, Александар Вуксановиќ и неговиот стручен тим, соопштува дека сме непријатно изненадени од лавината навреди, неосновани обвинувања, инсинуации и понижувања упатени кон нашата медиумска куќа. Како добар домаќин ќе обезбедиме еднакви услови за сите изведувачи, а за победникот ќе одлучува независно и стручно жири, како и публиката. Можеби некои луѓе не го сакаат тоа, можеби некои луѓе се навикнати да ги прават работите поинаку, можеби исто како што ги обвинуваат другите дека го прават тоа без никакви докази или основа. Поради добрата атмосфера во организацијата и меѓу натпреварувачите на „Песна на Евровизија 22“, никому нема да одговориме со лош тон. Сите наводи против РТС споменати од учесниците ќе имаат можност да се докажат во институцијата каде што се утврдуваат фактите. Радио телевизија на Србија ќе го организира овој натпревар на највисоко ниво на гордост на сите граѓани на Србија. На сите учесници им посакуваме многу успех и се радуваме за нивното учество и соработка со РТС“, напишаа тие.
Според многумина, најголема конкуренција на Лукас е пејачката Сара Јо.
„Верувам дека пола од луѓето од Србија и регионот не би ѝ дале 12 поени на Сара бидејќи не ни знаат која е. Да се разбереме, немам ништо против Сара лично, но која е таа да ми биде конкуренција? Со што?“, неодамна изјави Лукас за „Блиц“.
View this post on Instagram
Подоцна во интервјуто, сепак, тој беше посочувствителен кон својата колешка.
„Ја слушав како пее, одлично пее, секако ја слушав и нејзината песна со која ќе оди на натпреварот и многу ми се допаѓа, интересна е. Не знам кој ќе победи, но кој и да победи ќе биде заслужено“, заклучи Аца.
