Претседателот на палестинската управа Махмуд Абас денеска го повика Хамас да ги ослободи заложниците што се уште ги држи во Појасот Газа и да го предаде оружјето, со цел да се стави крај на војната.

Во телевизискиот говор, палестинскиот лидер рече: „Хамас ѝ даде изговор на криминалната окупаторска сила да ги изврши своите злосторства во Појасот Газа, од кои најочигледно е приведувањето заложници“.

„Јас сум тој што ја плаќа цената, нашиот народ ја плаќа цената, а не Израел (…) Ослободете ги заложниците“, нагласи тој.

Абас, исто така, го повика Хамас да ја отстапи одговорноста за Појасот Газа, да го предаде оружјето на палестинските власти и да се трансформира во политичка партија.