Жестока казна: Фудбалерот кој играше допингуван против Македонија Ѓ.П доби суспензија од четири години
Европската куќа на фудбалот УЕФА го казнила фудбалерот на ЦСКА Софија, Георги Јомов со суспензија од четири години, ваквите информации ги пренесуваат медиумите кои се блиски до клубот.
Крилниот фудбалер заработи суспензија на 25. август кога УЕФА објави дека во неговото тело биле пронајдени недозволени супстанци после натпреварот против Македонија Ѓорче Петров кој се одигра на 28. јули. На оваа средба Јомов беше и стрелец за бугарскиот клуб.
Примероците на тестовите покажале дека Јомов бил позитивен на супстанцата дехидрохлометилтестостерон која е стопирана во продажаба уште во 90-тите години и може да се купи само на црниот пазар.
Од тука „паѓаат вода“ тврдењата на Јомов кој се правдаше дека ваквата супстанца случајно била внесена во неговото тело. Фудбалерот има право на жалба на оваа одлука, меѓутоа како што стојат работите 25-годишниот Јомов го чека долга пауза и голем чекор назад во неговата кариера.
Во минатото тој беше дел и од Славија Софија, забележа и десет настапи за бугарската репрезентација за која постигна и два гола.