Вардарци со победа ја стартуваа одбраната на титулата во СЕХА лигата. „Црвено-црните“ пред своите навивачи со убедливи 37:23 (19:12) го совладаа Пекинг спорт универзитет.

Победата не беше доведена во прашање во ниту еден момент, разликата во квалитет беше и повеќе од очигледна и по само 10 минути остварија предност од 8:4. Како одминуваше времето, разликата се зголемуваше што му овозможи на наследникот на Роберто Гарсија Парондо на клупата, Давид Писонеро, да им даде шанса на сите ракометари.

Димитриоски и Шишкарев беа најпрецизни со по шест голови, додека Дисингер и Чупиќ дадоа еден помалку.

Следниот предизвик за Вардар во второто коло е гостувањето кај Мотор Запорожје и тоа ќе претставува првиот вистински тест за силата на европскиот шампион во оваа сезона.