Додека филмската индустрија постојано се врти кон нови лица и на црвените теписи доминираат млади ѕвезди, во срцето на Холивуд сè уште постојат оние кои своите кариери ги градеа во педесеттите години па и порано. Нивните почетоци датираат од времето на црно-белиот филм а меѓу нив има и такви кои веќе ја живеат својата втора стотка.

На самиот врв на оваа листа се наоѓа Ева Мари Сент која има 101 година. Актерката која дебитираше во 1946 година засекогаш се запиша во историјата со улогата во класикот „On the Waterfront“ за која доби и Оскар. Со својата елеганција во трилерот на Хичкок „North by Northwest“ таа ги постави стандардите за идеалната холивудска русокоса кои ретко кој може да ги надмине.

Веднаш до неа е и Дик Ван Дајк кој во декември минатата година го прослави својот 100-ти роденден. Кариерата ја започна во 1947 година а стана синоним за семејна забава благодарение на филмовите како „Mary Poppins“ и „Chitty Chitty Bang Bang“. Неговата виталност и денес предизвикува воодушевување кај публиката ширум светот.

Кога зборуваме за деведесетгодишниците невозможно е да се заобиколи Клинт Иствуд кој има 95 години. Од своите почетоци во 1954 година Иствуд помина пат од каубој до еден од најценетите режисери на денешницата.

Слична долговечност ужива и Вилијам Шатнер култниот капетан Кирк од „Ѕвездени патеки“ кој на свои 95 години е познат како најстарата личност која некогаш летала во вселената со што докажа дека границите постојат за да се рушат.

Листата ја надополнуваат и Сер Мајкл Кејн кој на 93 години неодамна најави повлекување по седум децении работа како и легендарната Розмари Харис која има 98 години.

Тука е и неповторливата Софија Лорен која на 91 година и понатаму останува симбол на безвременската убавина.

Меѓу „помладите“ на оваа листа на вечни легенди се наоѓаат и Морган Фримен, Дастин Хофман, Ентони Хопкинс кои имаат по 88 години како и Ал Пачино со 86 години.