Жителите на Ново Лисиче и Реонски центар се анкетираат дали се за зонско паркирање
Во населбите Ново Лисиче и Реонски центар се планира да се воведе зонско паркирање. Поради тоа, Општина Аеродром во соработка со јавното претпријатие „Градски паркинг“ започна кампања за информирање на граѓаните за бенефитите од зонското паркирање, а паралелно се спроведува и теренска анкета преку која граѓаните имаат можност да го искажат својот став за предлог иницијативата за регулирање на паркирањето во овој дел од општината.
На барање на граѓаните од овој дел од Аеродром и преку транспарента постапка и со вклученост на јавноста, по завршување на анкетата очекуваме да започне реализацијата на проектот со кој конечно ќе се регулира паркирањето во овој дел од општината, чекор кој ќе овозможи нови паркинг места, бесплатно и сигурно паркирање за станарите и со тоа ќе се стави крај на проблемите со недостаток на паркинг места и узурпирање на паркингот од страна на стари и хаварисани возила – велат од Општина Аеродром.
Оттаму апелираат до граѓаните да се вклучат во анкетата, а по нејзиното завршување Општината ќе ги преземе сите неопходни активности за во соработка со „Градски паркинг“ реализацијата на овој проект да се одвива со забрзана динамика.