Полицајци вчера уапсиле 40-годишен жител на кавадаречкото село Росоман, кој бил агресивен кон нив додека работеле, соопшти полицијата. Откако го уапсиле, полицајците му измериле неверојатни 3,66 промили алкохол во крвта – концентрација што може да биде фатална.

„Во 15:55 часот во Росоман, полициски службеници од ОВР – Кавадарци го приведоа О.Л., на возраст од 40 години од Росоман, затоа што агресивно се однесувал кон полициски службеници кои извршувале службени дејствија. При преземање мерки, кај него биле измерени 3,66 промили алкохол во крвта. По наредба на јавен обвинител, О.Л. е задржан во полициска станица и по документирање на настанот, против него ќе биде поднесена соодветна пријава, додадоа од СВР – Велес“, велат од МВР.

Концентрациите на алкохол во крвта од 3,5 до 4 промили се сметаат за исклучително опасни и луѓето кои ќе ја достигнат често паѓаат во кома и не се контактибилни. Жителот на Росоман бил многу блиску до смртоносната доза алкохол – над 4 промили, со која случаите без итна медицинска помош најчесто завршуваат фатално.