Криста Пајк треба да стане првата жена погубена во државата Тенеси по повеќе од 200 години. Пајк, која е единствената жена осудена на смрт во таа американска држава, треба да биде погубена на 30 септември 2026 година, повеќе од 30 години по злосторството за кое беше осудена, убиството на 19-годишната Колин Слемер, пишува „Унилад“.

Според записите од судењето, мотивот за убиството бил љубомора. Пајк верувала дека Колин Слемер се обидува да го заведе нејзиното момче Тадарил Шип, па заедно со него и еден пријател, таа ја намамила Слемер на едно затскриено место и таму ја убила.

Тадарил Арон Шип бил осуден на доживотен затвор за убиство од прв степен и дополнителни 25 години за заговор, додека нејзината пријателка Шадола Петерсон се изјаснила за виновна за соучесништво по настанот и добила шест години условна казна.

Пајк поднесе тужба во јануари оваа година, тврдејќи дека методот на смртоносна инјекција за извршување би ги прекршил нејзините уставни и религиозни права. Државата Тенеси одговори на 19 март, велејќи дека Пајк, која сега има 50 години, не обезбедила доволно докази за да ги поткрепи своите тврдења.

Во тужбата се наведува дека Пајк нема да може да комуницира со својот будистички духовен советник пред извршувањето, што е спротивно на нејзините „искрено религиозни верувања“. Оспорувањето на методот на извршување бара од неа да избере друг метод, но таа тврди дека тоа би ги прекршило и нејзините религиозни верувања бидејќи не смее „да учествува во никаков процес што води до нејзина сопствена смрт“.

Во декември 2024 година, Тенеси го промени протоколот за извршување. Наместо комбинација од три лекови, сега се користи само еден, пентобарбитал. Адвокатите на Криста Пајк тврдат дека овој метод ги крши и нејзините уставни права поради нејзините „уникатни медицински состојби“.

Адвокатите рекоа дека методот е „оптоварен со истите проблеми што ги мачат неуспешните егзекуции со децении: тајност, намерни пропусти, невнимание кон деталите и необучен и нелиценциран затворски персонал кој се обидува да преземе медицинска улога“.

„Поради тие неуспеси, новиот протокол сигурно или многу веројатно ќе предизвика непотребна и дополнителна болка и страдање, ужас и срам“, се вели во поднесокот, добиен од „Нешвил Банер“. Криста Пајк беше осудена на смрт за убиството на Колин Слемер во 1995 година.

Пајк имала 18 години во времето на злосторството. На суд беше утврдено дека Пајк ја намамила Слемер во шумата во Ноксвил, каде што брутално ја претепала и ја избодела. Таа врежала пентаграм на градите на жртвата. Пајк наводно зачувала дел од черепот на Слемер, кој подоцна им го покажала на своите колеги.

Телото на жртвата го пронашол чистач, кој изјавил дека било „толку осакатено што на почетокот помислил дека е труп од животинско потекло“. Пајк поминала приближно 30 години во исчекување на смртна казна и е единствената жена во Тенеси која е осудена на смртна казна.

Првпат по 70 години во САД ќе биде егзекутирана жена