Земјотрес со локална магнитуда од 3,0 степени според Рихтеровата скала утрово е регистриран во Охридско-струшкиот регион, информираат од Сеизмолошката опсерваторија при Природно-математичкиот факултет во Скопје.

Според податоците на опсерваторијата, потресот се случил во 05:36 часот, а неговиот епицентар потекнува од епицентралното подрачје Пештани–Охрид–Струга.

Досегашните информации покажуваат дека земјотресот бил почувствуван од жителите на Охрид и на Струга со интензитет од III степени според Европската макросеизмичка скала.

Од Сеизмолошката опсерваторија апелираат до граѓаните кои го почувствувале потресот да го пополнат прашалникот за почувствуваност на нивната веб-страница, со цел прибирање дополнителни податоци за сеизмолошките истражувања и анализа на настанот.

Засега нема информации за евентуални материјални штети или повредени лица.