Пожарникарите и доброволците успеаја да го изгаснат големиот пожарот што вчера избувна над Штип по удар од гром, соопшти утрово Дирекцијата за заштита и спасување.

Според Територијалната противпожарна единица Штип, во гаснењето биле ангажирани неколку противпожарни камиони и четири специјални теренски возила, бидејќи пожарот зафатил тешко пристапен терен со трева и грмушки, во чија близина има борови појаси, лозови и овошни насади.

Во интервенцијата учествувале 20 пожарникари од ТППЕ Штип со четири возила, 10 членови на Доброволното противпожарно друштво Штип со четири возила, како и екипи од Кочани со две возила и шест пожарникари и екипа од Свети Николе.

Дополнително, во гаснењето помогнале и 12 доброволни пожарникари со сопствени теренски возила.

Огнената стихија во текот на вечерта се гледаше од речиси целиот град, над кој се извиваа густи облаци од чад.

ВИДЕО | Драматична борба со огнот во Штип, градоначалникот бара помош од околните градови

Според првичните информации кои ги објавија локалните медиуми, пожарот избувнал по удар од гром во реонот над викенд-населбите Плуждино и Новакова Чешма.

Поради сувата вегетација и погодните временски услови, огнот брзо се проширил кон ридовите над градските гробишта во Штип.

Градоначалникот на Штип, Иван Јорданов, на вонредна прес-конференција изјави дека нема повредени луѓе и не биле зафатени куќи.

Опожарените места биле под надзор во текот на целата ноќ, а во текот на денот надлежните ќе утврдуваат дали има материјална штета и што точно го предизвикало пожарот.