Првпат во правосудната историја на Македонија е изречена ефективна затворска казна за убиство на животно. Основниот кривичен суд Скопје денеска го осуди Љубе Крстевски на три месеци затвор за свирепо убиство на кучето Феликс.

Како што соопшти организацијата „Зелен хуман град“, ова е првпат досега судот да изрече ефективна затворска казна за ваков вид кривично дело, што, како што истакнаа, претставува пресвртница во заштитата на животните во земјава.

„Пресудата е жив доказ дека активното граѓанство дава резултати. Промените се можни кога се бориме против неправдата. Денес е победа и за Феликс и за сите животни што биле жртви на насилство“, наведуваат од организацијата.

Од „Зелен хуман град“ најавуваат дека ќе се жалат на пресудата со цел да се залагаат за построги казни и системска заштита на животните, но денешната одлука ја сметаат за значајна победа.

„Ниту едно животно не е заборавено. Ќе продолжиме да се бориме додека секое живо суштество не го добие правото на живот, достоинство и заштита“, велат од организацијата.

За убиството на кучето Феликс, Љубе Крстевски доби 3 месеци затвор