Безбедносните мерки се засилени на натпреварите од Лигата на шампионите во Мадрид и Париз, откако медиум поддржан од Исламска држава објави закани за стадионите на кои се одржуваат четвртфиналните натпревари.

Француската и шпанската полиција, како домаќини на градовите каде се играат вечерашните натпревари, го подигнаа нивото на безбедносна закана и распоредија дополнителни полициски сили, јавува ХРТ.

Терористичката организација Исламска држава, позната по своите пропагандни најави насочени кон ширење страв, објави неколку фотографии од стадионите на кои се играат четвртфиналните натпревари од Лигата на шампионите.

Франција, земја каде ИСИЛ ја презеде одговорноста за последните осум напади, сериозно ги сфати заканите.

„Кога станува збор за важни настани како фудбалската Лига на шампиони, разговараме со нашите партнери. Побаравме од генералниот директор за внатрешна безбедност да ги сподели информациите што ги имаме со другите безбедносни служби на другите земји домаќини на четвртфиналето. За мечот што ќе се одржи во Париз, полицијата значително ги зголеми неговите активности и работи напорно“, изјави францускиот министер за внатрешни работи Жералд Дарманин.

ИСИЛ ја презеде одговорноста за неодамнешните смртоносни напади во Русија и Иран. По нападот во Москва, американската амбасада предупреди дека ризикот од нови напади е особено висок во Франција. Француската полиција извести дека во изминатите две недели успеала да спречи два напади и да уапси пет лица.