Високи износи за исплата на ангажмани покажува договорот меѓу Јавното претпријатие за државни патишта и конзорциумот предводен од „ИРД инженеринг“ за надзор над изградбата на коридор 8 и коридор 10д, договор што Владата го склучи минатата недела, објави „360 степени“. Документите покажуваат дека ќе бидат исплатени високи суми за ангажманот на експерти и дека иако надзорот е преставен како странски, главниот збор сепак ќе го имаат домашни експерти и фирми.

И покрај тоа што на чело на конзорциумот за надзор на „Бехтел и Енка“ стои „ИРД Инеженеринг“ од Италија, чиј претставник и ги потпишуваше договорите со Јавното претпријатие за државни патишта пред камерите, најголем дел од работата а со тоа и парите, ќе одат преку македонските фирми „Електра солушнс“ и „Евро консалтинг“, пишува „360 степени“.

Паушали од 300.000 евра по човек ќе им бидат исплатени на експертите вклучени во преговорите за цената на автопатските делници кои ќе ги гради американско-турскиот конзорциум „Бехтел и Енка“. Според документите, вкупно за четворицата државата ќе плати 1.200 000 евра.

Договорот отвора и други прашања за цените на услугите, кои, според „360 степени“ се европски, иако кадарот пред сѐ е македонски и нешто балкански?

На пример, услугата за секој геометар ќе се наплаќа по околу 5.600 евра месечно. Секој надзорен инженер ќе чини по 8 до 9.000 евра месечно, додека месечниот трошок за главен надзорен инженер е 20 000 евра – такви има четворица – за секоја од четирите делници. Најскап е директорот на проектот, Италијанецот Паоло Орсини, чиј ангажман ќе чини 27.000 евра месечно или вкупно 1,3 милиони евра во текот на целиот проект.

Прашање од 1,3 милијарди евра: Има ли корупција во автопатите?