ЕХФ денеска донесе неверојатни одлуки поради пандемијата на коронавирусот, ја исфрли Македонија од Светското првенство со тоа што ги укина баражите, а со одлуката да нема осминафинална и четвртфинална фаза во Лигата на шампионите, му ја скрати можноста и на Вардар да ја брани титулата.

Овие одлуки предизвикаа жестока реакција од поранешниот тренер на Вардар и селектор на Македонија, Веселин Вујовиќ, кој сега е тренер на Загреб кој ино исто така е голем критичар на ЕХФ.

Популарниот „Вујо мајсторе“ е револтиран бидејќи многу екипи останаа без можноста да се надеваат на пласман на завршниот фајналфор турнир во Келн.

– Историјата покажува дека речиси никогаш досега четирите најдобро пласирани екипи од групите не обезбедиле место на фајналфор турнирите. Секогаш имало изненадувања, некои екипи имаа проблеми со повреди или слаба подготвеност и дозволуваа изненадувања, нешто што се случи со ПСЖ минатата година. За мене оваа одлука е апсурдна бидејќи до Фајналфор турнирот многу играчи ќе играат во други клубови, Сагосен во групната фаза играше за ПСЖ, а во Келн ќе игра за Кил, тоа нема никаква врска со здравиот разум. Иако, јас веќе изјавив дека очекувам глупава одлука од ЕХФ, одлуката е донесена со декрет, никој нема право да се жали, а репрезентациите кои ги подготвуваа составите за СП сега нема да можат да се изборат за пласман. Но, од ЕХФ секогаш може да се очекува неочекуваното – изјави Вујовиќ за хрватски „Индекс“.