Српскиот претседател Александар Вучиќ реагираше на драматичните настани во Венецуела по апсењето на претседателот Николас Мадуро во американска воена операција. Во обраќање до медиумите и на вонредна седница на Советот за национална безбедност на Србија, Вучиќ рече дека нападот врз Венецуела покажа сериозни проблеми во меѓународниот правен поредок и работата на Обединетите нации, објавија хрватските медиуми.

Како што рече, ситуацијата во светот е таква што „правото на сила и правото на посилниот доминираат во глобалната политика“ и дека меѓународните норми и Повелбата на ОН во моментов важат само „на хартија“.

Вучиќ изрази загриженост за ескалацијата на конфликтот, нагласувајќи дека Србија го поддржува мирот и стабилноста, но и дека мора да се подготви за евентуални неизвесни глобални околности.

„Секој си ги гледа своите ситни интереси. Гледате, никаде нема принципи. Особено сме загрижени за понатамошното вооружување на Приштина, спротивно на Повелбата на ОН и Резолуцијата 1244, која де факто е суспендирана од големите западни сили и одредени регионални актери како што е Турција. Посебна закана за безбедноста и територијалниот интегритет на Србија претставува новосоздадениот сојуз на Приштина, Тирана и Загреб, кој вклучува заеднички развој на сложени одбранбени системи – од возила со погон на сите четири тркала до идеи за помоќно оружје. Србија внимателно го следи ова и ние не само што го следиме, туку и се подготвуваме да се одбраниме од оние кои веќе не само прикриено, туку и отворено покажуваат закани“,  рече Вучиќ.

Тој изјави дека ќе следат нови инвестиции во воената индустрија, продолжување на регрутирањето на специјалните сили и понатамошно вооружување на Србија.