Претседателот на Србија Александар Вучиќ им се заблагодари на пензионерите на кои денеска им беше исплатена помош од 20.000 динари (170 евра), за поддршката што и ја даваат на својата земја од 2014 година, порачувајќи дека ќе имаат повисоки пензии, јави дописникот на МИА од Белград.

-Почитувани пензионери, 20.000 динари државна помош не се малку пари, но знам дека е речиси ништо во споредба со она што и го дадовте на нашата земја, градејќи ја, создавајќи услови за сите нас што дојдовме по вас, да можеме да живееме пристојно и да имаме поинаква и подобра иднина, кажа Вучиќ во видеото објавено на Инстаграм профилот „Будуќностсрбија”.

Денеска нешто повеќе од 1,66 милиони пензионери во Србија, кои се на платниот список на Фондот за пензиско и инвалидско осигурување (ПИО), добиваат државна помош во износ од по 20.000 динари.

Вучиќ пред неколку дена најави, а денес беше потврдено од министерот за финансии, Синиша Мали, кој соопшти дека владата ќе усвои предлог за нов закон за исплата на нови 100 евра за младите. Процесот за аплицирање за нови 100 евра за младите од 16 до 29 години ќе биде отворен од 16 до 31 мај.

Како што прецизираше Мали, оние кои аплицирале за првите 100 евра за млади, чија исплата започна на 1 февруари, не мора повторно да аплицираат за оваа државна помош.