Време е за чај – три омилени вкусови, како три доби од животот

Unsplash
Unsplash

Ритуалот за пиење чај со трите омилени видови e еден вид лично патување низ вкусовите на различни временски „зони“ од мојот живот.

Да се пие чај, кај нас е некако поврзано најчесто со настинка, болест, некакви потешкотии во огранизмот, наместо секојдневно задоволство и зиме и лете.

Зошто е тоа така? Не знам. Знам дека моите баба и дедо, береа планински чај и во секое доба од годината кај нив чајникот беше полн до врв со чај. Не само планински, имаше и од камилица, нане, шипка… А кога бевме болни, се засладуваше со мед. За мене, секогаш послужен во омилената шолја, со зелени точки. Ретро остаток од креденците на баба и дедо.


Но, чајот не е само медицинска благодет. Тој е и ритуал, зближување со некого, прикрепување.

Историски гледано, чајот е поврзан со номадскиот живот и снаоѓањето во природа – митот вели дека првпат се случило некој да го „открие“ чајот, кога во водата што вриела на логорски оган, случајно паднале тревки и ете ти го чајот. Не сум сигурна колку е вердостоен овој мит, но сепак сакам да ги предложам моите три омилени чаеви за пријатно време.  Дури и ако некој вкус случајно го откријам, сакам да го пробам и немам предрасуди кога е во прашање чајот.

Прв чај на врвот на чајната скала за мене е чајот од нане.

Ми создава чувство на топлина, питок ми е и секогаш ми помага кога имам грчеви пред циклус или ако се чувствувам меланхолично. Чајот од нане е како прегратка од нана (баба).  Освен што е со прекрасен мирис, тој е и превентива од настинки. Мој прв избор кога го порачувам во кафуле.

Втор омилен чај ми е од ѓумбир и лимон.

Овој чај го „открив“ подоцна низ животот, кога студирав. Ми подарија за нова година мало ќесиче со чај од ѓумбир и лимон, кој имаше малку индиски изглед и си реков – хмм што е ова? На пакувањето стоеше информација дека помага за концентрација и циркулација. Топ за еден студент. И сега го пијам во различни пригоди, а најмногу ми одговара кога работам – како сега. Му ставам и свежо парче лимон и уживам.

Трет омилен чај е чајот од липа.

Освен што ме потсетува на Скопје и на некои љубовни времиња, ме потсетува на смиреност, спокој, благост. Липата има лековити својства, но најубаво е кога се пие чај од тазе набрана липа. Помага во ублажување на стресот, проблеми со дишните патишта, а совршен е со лажичка мед. Приказната за липата вели дека сето сонце што го собира низ летниот период, го „внесуваме“ преку пиењето чај.

Па, кој е вашиот омилен чај?

Видео на денот