14-годишно дете вооружено со пет пиштоли денеска отвори оган во училиште во Турција и уби најмалку осуммина ученици и наставник. Според последните информации, 13 други луѓе, ученици и вработени, се ранети во најкрвавиот напад со пукање во училиште во државата досега, јави Ројтерс.

Додека Турција е во шок од страшната трагедија, на социјалните мрежи се врти морничава снимка на која се гледа како ученици скокаат од прозорците на училиштето, во очајнички обид да избегаат од момчето кое сееше смрт. Предупредуваме дека снимката може да вознемири дел од публиката.

Kahramanmaraş Ayser Çalık Ortaokulu’nda yaşanan silahlı saldırıda öğrenciler okul camlarından atlayarak hayatta kalmaya çalıştılar.#kahramanmaraş pic.twitter.com/5SLTcwKQig

— Sol Yumruk (@Sol_Yumrukk) April 15, 2026

За нападот во провинцијата Кахраманмараш зборуваше турскиот министер за внатрешни работи Мустафа Чифтчи пред новинарите, информирајќи дека шестмина од повредените се во критична состојба.

„Ова е индивидуален, личен напад извршен од еден од нашите ученици, не станува збор за терористички чин“, рече Чифтчи.

Претходно, гувернерот на Караманмараш, Мукерем Унлуер, изјави дека напаѓачот се самоубил во метежот.

„Ученик од осмо одделение дошол со пет пиштоли и седум рамки куршуми – за кои веруваме дека му припаѓаат на неговиот татко, поранешен полицаец – во ранец, влегол во две училници со ученици од петто одделение и предизвикал смртни случаи и повреди без селекција“, рече Унлуер.

Учениците од петто одделение во Турција обично имаат 10 или 11 години. Ова е најкрвавиот оружен напад во турско училиште досега.