Вооружено беспилотно летало ја гаѓало воздухопловната база Ал Харир, која е домаќин на американските сили во северен Ирак, потврдија два безбедносни извори, по сирените кои предупредуваа за можен напад врз американската амбасада во Багдад, објавуваат светските медиуми. 

Сирените се огласиле во американската амбасада вечерва, изјавија неколку луѓе во Багдад, каде што се наоѓа амбасадата, но нема извештаи за ракетни напади или жртви.

Портпаролот на американската амбасада и претставник на ирачката влада за безбедност не одговорија веднаш на барањата за одговор. Американските и меѓународните сили стационирани во Ирак и преку границата во Сирија се во состојба на готовност поради десетици напади врз нивните бази во неделите по избувнувањето на војната меѓу Израел и Хамас.

Американските власти изјавија дека повеќето од нападите не ги погодиле нивните цели поради одбранбените системи. Тие за нападите ги обвинуваат групите поддржани од Иран.

Групата наречена Исламски отпор во Ирак ја презеде одговорноста за многу од нападите, велејќи дека тие биле одговор на американската поддршка за Израел во неговата војна против Хамас.

Ирачкиот премиер Мохамед ал-Судани вети дека ќе ги гони одговорните за нападите, вклучително и три воени бази во Ирак во кои се сместени советниците на коалицијата. Меѓу базите биле Аин ал Асад во западен Ирак, воена база во близина на меѓународниот аеродром во Багдад и Харир во Ербил, пишува Ројтерс.