Воените лидери на Мадагаскар денес изјавија дека армијата ја презеде власта во островската држава во Индискиот Океан, откако Долниот дом на парламентот гласаше за импичмент на претседателот Андри Раџоелина, кој избега во странство.

Воените лидери изјавија дека суспендирале неколку државни институции, јави Ројтерс.

„Уставот е суспендиран и е формиран претседателски совет составен од членови на армијата и жандармеријата“, објави офицер на специјалната единица CAPSAT пред претседателската палата во главниот град Антананариво.

Парламентот на Мадагаскар започна постапка за импичмент на претседателот

Претходно, Долниот дом на парламентот на Мадагаскар гласаше за импичмент на претседателот, кој избега во странство по судирите со демонстрантите предводени од млади и војската.

Раџоелина одбива да се повлече

Одлуката на Националното собрание, усвоена со 130 гласа „за“ и еден „против“, дојде неколку часа откако 51-годишниот лидер се обиде да го распушти Националното собрание со декрет, продлабочувајќи ја политичката криза во земјата.

Раџоелина одбива да се повлече, пркосејќи на неделите протести на Генерацијата З со кои се бараше негова оставка и масовните воени пребегнувања. Претседателството соопшти дека состанокот на парламентот бил неуставен и затоа секоја резолуција е „ништовна“.

Раџоелина рече дека се преселил на безбедна локација поради закани по неговиот живот. Претставник на опозицијата, воен извор и странски дипломат изјавија за Ројтерс дека избегал од земјата со француски воен авион во неделата.

Во објава на X, Раџоелина рече дека одлуката за распуштање на Националното собрание, која го отвора патот за избори најрано за 60 дена, е „неопходна за враќање на редот“ во Мадагаскар. Протестите во земјата избувнаа на 25 септември поради недостиг на вода и електрична енергија и брзо ескалираа во бунт поради пошироки проблеми, вклучувајќи корупција, лошо управување и недостаток на основни услуги.