Во тек јавниот повик на Град Скопје за субвенции за чистење оџаци
Со оваа мерка, Градот Скопје ќе надомести дел од трошоците во нето износ најмногу до 1.200 денари, а за субвенции можат да достават барање физички и правни лица чие живеалиште, односно седиште е на подрачјето на Град Скопје.
Град Скопје ги повика граѓаните и другите субјекти да се пријават за субвенции за чистење оџаци, како една од мерките за намалување на последиците од загадувањето на воздухот.
– Со оваа мерка, Градот Скопје ќе надомести дел од трошоците на домаќинства и на други субјекти за чистење на оџаците, во нето износ најмногу до 1.200 денари, а за субвенции можат да достават барање физички и правни лица чие живеалиште, односно седиште е на подрачјето на Град Скопје, информира прес – службата.
Изминатите години субвенцијата беше во износ најмногу до 1.000 денари.
Оттаму посочуваат дека досега за субвенции за чистење на оџаците се доставени 56 барања од граѓаните, а јавниот повик ќе биде отворен до 30 ноември 2020 година, по принципот „прв дојден прв услужен”, односно до реализирање на средствата предвидени за оваа намена со Буџетот на Град Скопје за 2020 година.
Град Скопје оваа мерка ја реализираше и во 2018 и 2019 година, кога беа доделени вкупно 634 субвенции.