Во Србија, голема кашлица е потврдена кај 1.020 лица до 7 јануари, а секој втор случај е кај деца на возраст од 10 до 14 години, покажуваат податоците на Институтот „Батут“.  Најголем дел од заболените се во Белград, каде е забележана и епидемијата, пишува РТС.

„Сигурно не сме имале толку пациенти во последните дваесет години, а резултатот од толкав број пациенти може да се објасни со неколку причини – вели др. Ивана Беговиќ Лазаревиќ, епидемиолог на Градскиот институт за јавно здравје.

Кај нас, пак,  засега има само два позитивни случаи. Едниот е случај од Кичево, а вториот случај е веќе хоспитализиран во „Козле“ и станува збор за шестмесечно бебе од Скопје. И двете деца не се вакцинирани.

Единствениот виновник за враќање на вакви заборавени заразни болести е резултат на сè помалиот број вакцинирани деца, посочуваат лекарите.

И министерот за  здравство Фатмир Меџити денеска апелираше до родителите да ги вакцинираат своите деца.