Во „Слободен печат“ немало и нема да има говор на омраза
„Слободен печат“ – и весникот и порталот – не објавил, ниту ќе објави, статус, изјава… што содржи говор на омраза, навреди, повици на насилство и други слични изрази кон личности и заедници врз национална, религиозна, етичка или каква било друга припадност.
Не само поради тоа што таквите содржини се во спротивност со новинарскиот кодекс, туку и поради тоа што се косат со моралните принципи на луѓето кои работат и го водат „Слободен печат“.
Последниот случај – поточно речено скандал – со статусот на Бранко Тричковски објавен на „Фејсбук“ во врска со министерката за труд и социјална политика Рахела Мизрахи е илустривен доказ за ваквиот став на нашиот медиум.
„Слободен печат“ не само што не го објави, туку и најостро, јавно, ја осудува неговата антисемитска порака до министерката.
Но, Тричковски е колумнист на „Слободен печат“ и како што е познато, многу е тешко да со одвојат личноста од неговото дело. И, наместо да се направи таа разлика – без оглед колку е тоа „тешко“ – сите злонамерни медиуми побрзаа да го поистоветат „Слободен печат“ со ставот на Тричковски.
Дури и да ја нагласат улогата („придонесот“) на нашиот медиум во ширењето говор на омраза, иако статусот на Тричковски воопшто не беше пласиран преку „Слободен печат“!
Редакција „Слободен печат“