Во Португалија, шефовите не смеат да им пишуваат пораки на вработените по работното време
Во Португалија отсега ќе биде незаконски за вашиот шеф да ви пишува пораки после работа, а компаниите мора да придонесат за трошоците што произлегуваат од работењето од дома, пишува британски Мирор.
Новите правила одобрени од парламентот на земјата во петокот се одговор на експлозијата на домашната работа како резултат на пандемијата, соопшти владејачката Социјалистичка партија во Португалија.
Според новите закони, компаниите ќе треба да помогнат во плаќањето на трошоците направени од работењето од дома, како што се повисоки сметки за струја и интернет.
Работодавците би можеле да се соочат и со казни за контактирање со работници надвор од работното време.
View this post on Instagram
Поголема слобода за работниците
Новите закони им забрануваат на работодавците да ги следат своите вработени додека работат од дома.
Измените на португалските закони за работни односи имаат ограничувања; нема да важат за фирми со помалку од десет вработени.
Предлогот да се вклучи „правото на исклучување“ – законското право да се исклучат пораките и уредите поврзани со работата надвор од работното време – беше отфрлен од португалските пратеници.
Новите правила ќе бидат добредојдени вести за родителите на мали деца, кои сега имаат право да работат без да мораат однапред да го договорат тоа со нивните работодавци, додека нивното дете не наполни осум години.
Новите мерки, исто така, имаат за цел да се справат со осаменоста, при што се очекува компаниите да организираат состаноци лице в лице најмалку на секои два месеци.
Португалија беше првата земја во Европа што ги промени правилата за работа на далечина како резултат на пандемијата.
Привремените мерки воведени во јануари годинава го направија работењето од дома за задолжителна опција, со неколку исклучоци. Работодавците исто така беа обврзани да ги обезбедат потребните алатки за извршување на работата од дома.
Додека далечинското работење во текот на пандемијата донесе нова флексибилност за многумина, потребата за понатамошна интервенција стана очигледна преку прашања како што е нееднаков пристап до ИТ опрема.