Турскиот министер за внатрешни работи во вторникот објави масовна операција против организираниот криминал во пет земји, што доведе до повеќе од 200 апсења, пред сè во Турција.

„Утринава беа приведени вкупно 234 членови на високо ниво на организирана криминална група, од кои девет беа во странство, а 225 дома“, рече Али Јерликаја на прес-конференција.

Тој рече дека истовремени рации биле извршени во Холандија, Германија, Шпанија, Белгија и Турција.

„Како дел од оваа операција, информации и документи беа споделени со полициските сили на Франција, Англија, Австралија, САД, Грција, Србија, Азербејџан, Косово, Бугарија, Северна Македонија, Бразил и Иран“, објасни турскиот министер Јерликаја.

„Меѓу уапсените има членови на организации вклучени во шверц на кокаин, хероин и екстази на неколку континенти“, додаде турскиот министер за внатрешни работи. Запленети се повеќе од 21 тон дрога, како и имот во вредност од 13 милијарди турски лири (300 милиони евра).

„Се соочуваме со голем меѓународен синџир“, рече Али Јерликаја, нагласувајќи дека осомничените се обвинети за низа кривични дела, од трговија со дрога до перење пари и убиства.