Седум жители на пензионерски дом во Белгија починаа, откако се заразиле со колумбиска варијанта на коронавирус и покрај тоа што биле вакцинирани.

Оваа варијанта на коронавирусот, за првпат се појави во Колумбија, а во последните недели беше потврдена во Соединетите држави, додека пак се уште е ретка во Европа.

Седум луѓе кои починаа во пензионерски дом во белгискиот град Завентем, недалеку од Брисел, беа во осумдесеттите или деведесеттите години, а некои веќе беа во лоша здравствена состојба, рече Марк Ван Ранст, вирулог на Универзитетот во Левен, кој ја анализираше варијантата на вирусот.

Тој додаде дека е загрижувачки што починале иако биле целосно вакцинирани.

Научниците се уште не знаат дали колумбиската варијанта се пренесува полесно од другите, рече тој.

Во Белгија, таа варијанта учествува со помалку од 1% од познатите случаи на ковид-19, во споредба со САД каде застапеноста е 2%.

Во Завентем се заразија 21 жител на пензионерскиот дом и неколку вработени. Вработените во домот имаа само благи симптоми.

Ван Ранст рече дека во Белгија доминантна е делта варијантата, која првпат се појави во Индија.