Исечканата зелена салата во кеса, иако изгледа практична и здрава, се смета за една од најризичните намирници во супермаркетите. Лиснатиот зеленчук е поврзан со околу 22 проценти од сите епидемии на труење со храна во текот на изминатата деценија, а експертите особено предупредуваат за салатите означени како „измиени и подготвени за јадење“.

Проблемот се јавува затоа што спакуваната салата често доаѓа од неколку различни извори и се обработува заедно. Ако е контаминирана само една серија, бактериите лесно можат да се прошират на голем број кеси. Дополнително, сечењето на листовите го оштетува растителното ткиво, кое ослободува влага. Оваа влага се задржува во кесата и создава идеални услови за размножување на бактериите, особено ако има промени во температурата за време на транспортот и складирањето.

Контаминацијата може да се случи во секоја фаза од производството: веќе на полето (поради загадена вода за наводнување, животни или луѓе), за време на бербата, како и подоцна во фабриките за преработка и пакување. Поради големиот број „ризични точки“, спакуваната зелена салата и спанаќот се особено чувствителни. Најчестите бактерии поврзани со овие производи се ешерихија коли, салмонела и листерија, кои можат да предизвикаат сериозно труење. Листеријата е особено опасна бидејќи може да се размножува дури и на ниски температури во фрижидер, па затоа претставува голем ризик за бремени жени, постари лица и лица со ослабен имунитет- пишува Каматица.

Иако на пакувањето често пишува дека салатата е „измиена три пати“, ова не гарантира целосна безбедност, бидејќи е речиси невозможно да се отстранат сите бактерии. Дополнителното миење дома може да не помогне, па дури може и да го зголеми ризикот ако се прави во нехигиенски услови. За да се намали ризикот, се препорачува да се избере цела, свежа салата наместо исечена од кеса, правилно да се чува во фрижидер, да се почитува датумот на истекување и да се избегнува вкрстена контаминација со сурово месо. Особено чувствителните групи треба да избегнуваат спакувана салата, а во случај на симптоми на труење, важно е да се известат здравствените установи со цел да се следи изворот на инфекцијата.