ВИДЕОИНТЕРВЈУ| Илија Николовски, Партија на пензионери: Ја продолжуваме битката за закон за минимална пензија
За да се полни Фондот за пензиско осигурување, треба борба против сивата економија, борба против газдите на големите компании што го изигруваат системот и не плаќаат доволно
Законот за минимална пензија беше заложба на Партијата на пензионери и во време кога беше коалициски партнер на претходната влада. Претседателот на партијата на пензионери Илија Николовски, во разговор за утринската програма на „Слободен печат“, вели дека тие и понатаму се залагаат за вакво законско решение, како и за социјални пакети за најзагрозените пензионери. Притоа, Николовски нагласува дека како партија на центарот, која идеолошки не е оптоварена, иако не партиципираат во овој собраниски состав, тие имаат добри комуникации со ВМРО-ДПМНЕ и очекуваат поддршка за подобар стандард на пензионерите.
Препорачано
-
1
-
2
-
3
Пензионерите, пак, веќе ја трошат линеарно зголемената пензија од 2.500 денари. Според Николовски, тие секогаш се залагале за вакво повремено нивелирање, со цел да се зголемат најниските пензии, но дека подолгорочно, ова е неправично решение.
– Се залагавме за повремено линеарно нивелирање. Имаше многу голема разлика меѓу минималната и највисоката пензија и за тие со минимални пензии беше уметност да се преживее. И од таа гледна топка го поздравуваме линеарното зголемување како ад хок решение. Но, како системско, ова не е добро решение. Пензијата е економска, а не социјална категорија. За оние со минимални пензии, државата треба да има некои социјални пакети и треба да има пристојна пензија за да преживеат, или таканаречена државна пензија. Затоа, Партијата на пензионери се залагаше и се залага за да тоа се актуализира – да се донесе закон за минимална пензија. Со тој закон, минималната пензија би била 70 отсто од минималната плата. Па и да е 65 отсто би било попристојно од сега – вели Николовски.
Тој вели државата не води доволна сметка за да се полни Пензискиот фондот.
– За да се полни Фондот, треба борба против сивата економија, борба против газдите на големите компании што го изигруваат системот и не плаќаат доволно. А на тој начин Пензискиот фонд е ослабен. Ослабен е и од политички причини. На пример, со онаа мерка „Македонија вработува“ се вработија 20.000 граѓани, а државата иако презеде обврска, не им уплаќаше придонеси – вели Николовски.
Сепак, тој низ бројки информираше дека сега Пензискиот фонд е во најдобра состојба – во 2017 година минусот во Фондот за ПИОМ што се надополнувал од државната каса бил 49 отсто, а сега се движи околу 33 проценти.
Целото ВИДЕОИНТЕРВЈУ погледајте го погоре.
