Во последните години значително се зголемува бројот на деца со алергии, астма, автоимуни и други заболувања поврзани со нарушен имунолошки систем. Педијатарот д-р Александар Сајковски од приватната болница Аџибадем Систина во емисијата „Медицинско катче“ вели дека причините се повеќеслојни, од загаден воздух и прекумерната употреба на антибиотици, до пестицидите во храната и недостигот на витамин Д.

-Објективно, и алергиите и инфекциите се поврзани, бидејќи и двете прават атак врз имунолошкиот систем. Во последните децении кај нас се зголемува бројот на деца со атописки дерматити, уртикарии, алергиски ринити, конјунктивити, па дури и бронхијална астма – вели д-р Сајковски.

Тој објаснува дека децата во предучилишна возраст имаат право да се разболат и да поминат и до 8–10 вирусни инфекции годишно, бидејќи имунолошкиот систем созрева постепено.

-Најголем дел од тие инфекции се вирусни и не бараат антибиотик. За жал, кај нас антибиотиците се користат премногу – посочува педијатарот.

Според него, аерозагадувањето е еден од најсериозните фактори што влијаат врз здравјето на децата.

-Во ПМ-честичките се лепат различни токсични материи кои предизвикуваат воспалителни реакции во белите дробови. Најранливи се децата, бидејќи се ниски и директно ги вдишуваат издувните гасови – вели Сајковски.

Дополнителен проблем, според него, е неконтролираното користење пестициди и хемикалии во земјоделството.

-Пестицидите се отров на 21 век. Ние немаме доволна контрола врз тоа колку се користат и колку се токсични. Гледаме драматичен пораст на болести кои не треба да бидат толку застапени кај децата, тешки алергии, автоимуни и малигни заболувања – предупредува докторот.

Тој советува родителите да обрнат внимание на квалитетот на храната и, кога е можно, да избираат органски производи.

-Ако детето се храни квалитетно, нема потреба од дополнителни мултивитамини. Природното внесување витамини е секогаш подобро од синтетичкото – вели Сајковски.

Особено ја нагласува важноста на витаминот Д.

-Витаминот Д не е важен само за коските, туку и за имунитетот. Децата со ниско ниво на витамин Д имаат поголема склоност кон алергии, автоимуни и други заболувања – објаснува тој.

Според препораките, суплементација со витамин Д е задолжителна во првата година од животот, а често и во првите шест години, особено во есенските и зимските месеци.
Докторот ги советува родителите повеќе да ги изложуваат децата на сонце и физичка активност.

-Не треба да се плашат да ги шетаат децата. Сонцето е природен извор на витамин Д. Децата треба да поминуваат време надвор, на чист воздух, а овошјето да го јадат цело, наместо да пијат сокови – порачува д-р Александар Сајковски.