Од 1 јули 2019 година започна мерката „Мој ДДВ“, со која на граѓаните им се враќаат 15% од платениот ДДВ, со цел да се врати дел од парите и да се намали сивата економија.
Слободен печат ги праша граѓаните зошто скенираат сметки и дали навистина имаат придобивки од оваа мерка.

Повозрасна госпоѓа без размислување ни одговори дека нема големи очекувања:

-Па, нешто малку. Некогаш цела сума, некогаш половина, некогаш ништо.

И помладите граѓани го користат овој начин за враќање на дел од парите.

– Да, скенирам сметки  – ни рече еден млад минувач.

Една жена додаде дека во моментов не скенира сметки поради други приоритети. А еден постар господин рече дека нема потреба од скенирање.

Еден пензионер вели дека луѓето имаат придбивка од скенирањето.

-Гледам луѓе, одат по контејнери, собираат сметки. До кој степен се дојдени? Мислам, срамота е тоа – вели тој.

На прашањето дали економската криза ги тера луѓето повеќе да скенираат, одговорите беа едногласни:

-Да!

Една разочарана жена изјави дека скенирањето е залудно, а помлад господин рече дека парите од поврат на ДДВ му се наоѓаат.

-Не е нешто, но за неколку денови, на пример, за јадење, со парите од сметките ќе пополнам – вели тој.

На крај, една госпоѓа иронично се смееше за времето во кое живееме:

-Со кој буџет да купуваме за да скенираме? – рече таа.