ВИДЕО | Во Кина јавно посрамотени луѓето кои не ги почитуваат ковид мерките
Најмалку четири лица осомничени за кршење на строгите мерки против коронавирусот во Кина се јавно посрамотени во град на југот на земјата, пишува британски Телеграф.
Тие ги одвеле прекршителите пред толпа луѓе
Државните медиуми денеска објавија дека властите ги одвеле прекршителите во бели заштитни одела пред толпа луѓе во градот Џингси во автономната област Гуангкси.
Лицата се обвинети дека им помагале на илегалните мигранти да ја преминат границата од соседен Виетнам.
Од почетокот на пандемијата, националните граници на Кина се затворени поради страв од ширење на коронавирусот.
Носеле картони со нивните фотографии и имиња
Кратките видеа кои кружат на социјалните мрежи ги покажуваат луѓето како носат картони со нивната фотографија и име додека двајца чувари ги водат низ бучните улици. Парадата ја надгледуваа десетици полицајци, некои од нив и вооружени.
На кинеските социјални мрежи драстичните владини мерки добиваат одредено охрабрување.
„Луѓето како нив го заслужуваат тоа. Што ако го донесат вирусот во земјата? пишува еден корисник на онлајн платформата Weibo.
Сцени кои потсетуваат на времето на Мао Це Тунг
Сцените потсетуваат на јавните понижувања кои беа вообичаени за време на културната револуција под Мао Це Тунг, од 1966 до 1976 година.
Кинеската влада целосно ја забрани парадата на обвинетите во 2010 година, но во последниве месеци оваа практика беше оживеана во пресрет на контролата на коронавирусот.