Египетските власти уапсија туристички водич за вандализирање на пирамида стара 4.000 години. Египетскиот туристички водич беше уапсен откако се појави видео на кое се гледа како црта цртежи со креда на пирамида во археолошкото наоѓалиште Сакара во близина на Каиро.

Лицето кое го снимило видеото дури опишало како кога му кажал на туристичкиот водич дека она што го прави е погрешно, тој одговорил: „Сериозен ли си?“

По апсењето, туристичкиот водич признал дека го испланирал инцидентот, а египетското Министерство за внатрешни работи започна истрага за инцидентот. Според локалните медиуми, туристичкиот водич наводно се извинил, тврдејќи дека тоа му е прв ден на работа по четири години и дека прекумерната возбуда го навела да направи „непростлива грешка“.

Според египетскиот закон, туристичкиот водич се соочува со минимум една година затвор и парична казна од 6.500 евра ако биде осуден за оштетување антиквитети.

Како што објаснија археолозите за „Дејли меил“ , хемикалиите содржани во кредата можат да реагираат со варовник и гранит, потенцијално предизвикувајќи површинска ерозија.

Од своја страна, Египетскиот синдикат на туристички водичи нагласи дека неговите членови посветуваат големо внимание на зачувувањето на спомениците и го опиша инцидентот како изолирана грешка.