Реал Мадрид обезбеди пласман во финалето на Суперкупот на Шпанија по триумфот над градскиот ривал Атлетико Мадрид со 2-1, во дерби средба исполнета со динамика и тензии.

„Кралевите“ имаа идеален старт на натпреварот, откако уште во втората минута Федерико Валверде прецизно погоди од слободен удар и му донесе рано водство на својот тим. Контролата на играта им донесе нова радост на избраниците на Чаби Алонсо во 55. минута, кога Родриго го зголеми водството на 2-0.

Атлетико брзо реагираше и преку Александер Сорлот намали на 2-1, со што ја врати драмата во натпреварот. Во продолжението „јорганџиите“ беа поагресивни и имаа повеќе од играта, но не успеаја да ја искористат ниту една од создадените можности.

Со оваа победа Реал Мадрид си закажа финална пресметка во Суперкупот, каде што за трофејот ќе се бори против големиот ривал Барселона.