Инцидент се случил вчера во селото Добровница кај Крива Паланка, кога, според кажувањата на дел од жителите, проблематично семејство од селото ги пуштило кравите во нивата со необрана зелка на нивните комшии.

Напнатата ситуација ескалирала во туркање и физичка пресметка меѓу агресивните сопственици на кравите и оштетените соседи.

Дел од жителите на Добровница се жалат и дека добивале закани од членови на семејството, кое го обвинуваат дека постојано ги пушта кравите слободно да талкаат низ селото, а тие им прават штета на соседите. Тие за денес најавија протест на кој ќе го изразат револтот од однесувањето на семејството.

„На 26.11.2025 година во 11:00 часот во село Добровница ќе се одржи собир поради тоа што кравите прават голема штета на имотите, нивите и околината. Целта е заедничка да се најде решение од кое ќе има корист целата заедница. Ги покануваме сите мештани да присуствуваат. На собирот ќе има и телевизии, за да се пренесе ситуацијата и да се слушне нашиот глас!“, пишува во најавата на протестот на социјалните мрежи