Како што неговиот долгогодишен ангажман во „Доцното шоу“ (The Late Show) завршува, Стивен Колберт го закажа својот следен ангажман, објави „Ин стајл“.

Вчера, режисерот Питер Џексон потврди дека комичарот ќе помогне во „развојот на сценариото“ за петтиот дел од филмската франшиза „Господарот на прстените“ (The Lord of the Rings), базирана на романите на Џ.Р.Р. Толкин.

Колберт и Џексон ја споделија веста во видео што „Варнер брос“ го објави денес на Икс.

In honor of Tolkien Reading Day and the destruction of the One Ring, we bring you a special announcement. pic.twitter.com/ufh9RLBIxO

— Warner Bros. (@warnerbros) March 25, 2026

„Мошне сум среќен. Знаете колку ми значат книгите и колку ми значат вашите филмови“, му рече Колберт на Џексон.

Заедно со Филипа Бојенс и Питер Мекги, Колберт ќе го адаптира сценариото за „Господарот на прстените: сенка на минатото“ (The Lord of the Rings: Shadow of the Past). Овој филм ќе следи по четвртиот филм од франшизата закажан за 2027 година, со поднаслов „Ловот на Голум“ (The Hunt for Gollum).

Колберт, голем обожавател на Толкин, продолжи да објаснува како раните поглавја од авторската „Дружина на прстенот“ (Fellowship of the Ring) никогаш не влегле во адаптацијата на Џексон од 2001 година.

„Можеме ли да направиме нешто што е целосно верно на книгите, а истовремено да биде целосно верно на филмовите што вие веќе ги направивте?“, вели Колберт.

Си-би-ес го објави откажувањето на „Доцното шоу“ во јули 2025 година. Кога премиерно се емитуваше во 1993 година, го водеше Дејвид Летерман, а Колберт ја презеде улогата по пензионирањето на Летерман во 2015 година.