Капитенот на Тотенхем, Сон Хјун мин, објави дека одлучи да го напушти лондонскиот фудбалски клуб по една деценија. Јужнореецот на прес-конференција во Сеул изјави дека ја донел најтешката одлука во својата кариера.

– Бев многу млад кога дојдов сам во северен Лондон, не зборував англиски. Го напуштам Тотенхем како возрасен, горд на сè што доживеав. Ми треба нова средина и промена – 10 години е долго време. Поминав многу време размислувајќи дали сакам да го доживеам фудбалот во поинаква средина – рече Сон.

Запиша 454 настапи за Тотенхем во сите натпреварувања од 2015 година, постигнувајќи 173 гола и 101 асистенција. Сон го предводеше Тотенхем до славата во Лигата на Европа во мај, кога лондонскиот клуб го освои својот прв трофеј по 17 години.

Тој има договор со Тотенхем до крајот на сезоната, а медиумите известуваат дека наскоро би можел да стане фудбалер на Лос Анџелес.

Тотенхем ќе одигра пријателски натпревар против Њукасл во Сеул, а тоа би можел да биде последниот меч на Сон во дресот на англискиот клуб.

An emotional Son Heung-min announcing he's decided to, "leave this club". 😭

Still pinching myself. 🫡🇰🇷#손흥민 #Spurs pic.twitter.com/C6Q3vLLI2y

— Joel Kim (@KNTFootball) August 2, 2025